Wakiilka
SDWO.COM Shiine Cilmi Kaahin oo la sawiran reerka danyarta ah
Caawi
Reerkan Gaajadu la deristay
Click
Here for more information
Hargeysa (SDWO 26/08/08)- Muddo bil
ka hor ah ayey ahayd markii qoys danyar ah oo degan xaafadda isku raranta
ah ee State House ee magaalada Hargeysa oo ka kooban toddoba carruur ah,
hooyadood iyo aabahood ay go'aan ku gaadheen inay carruurtoodii dadka u
qaybiyaan oo ay u soo bandhigaan, si ay uga badbaadiyaan inay geeri ay
sababto gaajo iyo wax hayn la'aan haleeshay
Sawirka
qaar ka mid ah caruurta qoyskan oo shaah iyo roodhi isku cunaya - Maanta
ugu yaraan waakuwaa roodhida ku qadaynaya, ka dib caawimooyin ka soo
gaadhay jaaliyadaha dibadaha ee u dhashay somaliland
Hooyada qoyskan oo magaceeda la
yidhaa Xaliimo Cismaan Dagaal ayaa go'aankan ay ku doonayeen inay
carruurtooda u qaybiyaan dadka waxay u sheegtay suxufiyiin waqtigaa hawlo
shaqo ka waday xaafadaas, kuwaas oo iyaguna si xilkasnimo ku jirto
bulshada ugu bandhigay. Waxaanay arrintaasi keentay in ay u gurmadaan
qoyskan jaaliyadaha reer Somaliland ee ku dhaqan dalka dibadiisa oo lacago
caawimo ah ugu soo hagaajiyey xawaaladaha dalka.
Lacagahaa ay loo soo diray qoyskan
waxay ka badbaadiyeen xaaladdo halis ah oo ay ku jireen, waxaanay ka
badbaadisay carruurtoodii inay qaybiyaan, waxa kale oo loogu dhisay guri
ka kooban qol jiingad ah.
Muuqaalka
Dhismaha sandaqada ah ee loo dhisay qoyska
Xaaladda adag ee dhaqaale xumada
macaluusha qarka u saartay qoyskan, waxa kale oo u sii dheer Aabaha qoyska
oo waqtigan u jiifa xannuun haleelay oo aannu ka shaqaysan Karin.
Haddaba, waxa caawimadii lacageed ee
ugu dambaysay qoyskan la siiyey shalay, taas oo ahayd lacag gaadhaysay
$210 (laba boqol iyo toban dollar) oo ay iska ururiyeen shakhsiyaad
muwaadiniin ku dhaqan dalka Ingiriiska, gaar ahaan Waqooyiga London,
waxaanay lacagtan ku soo hagaajiyeen Guddoomiyaha SDWO Guuleed Cabdi
Sheekhaash iyo Yuusuf Caawiye oo ku sugan London. Lacagtan
waxa qoyska danyarta ah ee dhibaataysan guddoonsiiyey Wakiilka shabakadda
wararka SDWO ee magaalada Hargeysa . Shiine Cilmi Kaahin.
Wakiilka SDWO.COM
Shiine Cilmi Kaahin oo gudoonsinaya $210
Hadii aad jeceshahay inaad hor
ilaahay uga qaybqaadato taakulanaynta danyarta aan cidina u maqnayna
ceelna u qodnayn, waxaan kaa cosanaynaa inaad nala soo xidhiidho guled@sdwo.com
or (sdwouk@yahoo.com)
Iyadoo ay jiraan xaaladdo adag oo
sicir-barar iyo dhaqaale xumo ay sabab u tahay shaqo la'aanta baaxadda leh
ee jirta oo noqday duruufo qallafsan oo is barkan oo ku habsaday dhammaan
bulshada reer Somaliland, gaar ahaan danyarta aan haysan cid ay gargaar ka
helaan Alle mooyee, ayaa haddana waxa kaabiga innagu soo haysa bishii
barakaysnayd ee Ramadaan oo maalmo keliya uuni inaga xigtaa.
Duruufahan adag ee dalka jira ee ay
salka u yihiin sicir-bararka ku yimi raashinka daruuriga ah ee la quuto
iyo shaqo la'aanta aan xadka lahayn oo bilihii u dambeeyey maalinba
maalinta ka dambaysa ka sii darayey, ayaa waxay dhaxalsiiyeen bulshada
inteeda badan inuu soo foodsaaro faqri iyo gaajo haleela dadka miyi iyo
magaalaba, gaar ahaan dadka danyarta ah ee horeba u ahaa qaadaa-dhergaha
maalina hela maalina waaya, iyada oo marar badan laga dayriyey xaaladdooda
nololeed, isla markaana dad mutadawiciin iyo hay'ado wadani ahi ka
bixiyeen qaylo-dhaan ku wajahan in dadkaa loo gurmado.
Sicir-bararka iyo dhaqaale xumada ku
habsatay dalka waxa shacbiga Somaliland u sii raacay oo wehel u noqday
duraafahaa qallafsan heshiis dhoofka xoolaha nool ah oo ay xukuumaddu la
gashay maalqabeen Sucuudi ah oo magaciisa la yidhaa Saleebaan Al-jabiri,
kaas oo dhigaya in keli uu ku ahaado sayladaha iibsiga xoolaha nool, isla
markaana uu isagu dhoofiyo oo aanay jirin cid kale oo muwaadin ama ajanebi
kale ah oo xoolo dhoofin kartaa. Waxa laga warqabaa in xoolaha nooli ay
yihiin laf-dhabarta dhaqaalaha dalka Somaliland, kuwaas oo ka ganasigooda
iyo manaaficaadsigoodaba ay ku tiirsanayeen malaayiin qof oo muwaadiniin
ahi, iyada oo ay gebi ahaanba uu istaagay xaamiga suuqyada ama sayladaha
xoolaha lagu kala iibsado, arrintaas oo dhalisay in boqolaal qof oo ku
noolaa iibka dhoofka xooluhu ay maanta shaqo la'yihiin, isla markaana waxa
istaagay dhaqdhaqaaqyadii ganacsi ee muwaadiniinta ka baayac-mushtaraynsa
dhoofka xoolaha oo aanay jirin wax ay dhoofiyaan hadda.
Arrintan waxay dalka ka dhalisay
muran xooggan oo dhexmaray xukuumadda iyo ganacsatada kooto-diidka ee
muwaadiniinta ah, kaas oo gaadhay xadhig lala beegsaday Guddoomiyaha
Guddiga Ganacsatada, waxaana dhexdhexaadin laga galay aakhirkii ay keentay
in xoolo dekeda ku xayirnaa la fasaxo wadahadalna la furo, inkasta oo aan
la ogayn halka wadahadaladaasi ku dambeeyeen.
Haddaba, dadka aad u fara badan oo
danyar ah ayey xaaladdahaa adag ee ishuwani khatar ba'an gelisay
noloshoodii, kuwaas oo in badan oo ka mid ahi si ay u badbaadaan waxtar
iyo gacanqabasho ula ciirsadeen bulshoweynta oo inyar oo ka mid ah uu wax
loo taray, balse intoodii badnayd aanay jirin cid u maqan iyo cid ka
warhaysaa toona.
Shiine Cilmi Kaahin SDWO News Desk
- Hargeysa
sirshiine@yahoo.com
M
